續前回:-
試完自已套cheap cheap set up，覺得未必試到條接線嘅真正威力，所以即刻call Kaman放工去佢屋企試試佢套貴嘢，記得佢嗰日係病住嚟車站接我，但我都照去煩佢，諗返我都覺得有少少冇人性
，去到已急不及待拆下條Cardas Neutral Reference RCA，再拆埋佢個MG Head Headamp，神速接上條Cystal Cable再搭部GS-1試，耳筒照用ATH L-3000，先試咗兩首歌，一聽之下，嘩~~分析力強到嚇死人，高音去得好盡，低頻衝得好激烈，隻L-3000變成猛獸一樣，不過分析力實在太高，聽咗十分鐘唔夠，已經要休息一下，太高分析力令我聽得幾辛苦，條線用落X-03 SE上，聽耳筒未必適合，如用上音箱可能効果會好好多，再加上配搭上可能唔夾，遲吓再試試阿豪部Meridan G08，聽吓佢個配搭有冇分別。
待續...
上個星期約阿豪出來食飯，順便玩交換玩具，佢攞咗條Crystal Cable出來俾我玩，真糠慨，成八千幾銀嘅線都肯借我玩。
其實我對Crystal Cable都認識不深，只係知道佢係Siltech老細個老婆開出來的公司，仲有就係好貴~~所以得個睇字。
起初由阿豪接過來時真係嚇一跳，包裝非常精緻，一組線整整齊齊放在小皮盒內，貴嘢即係貴嘢，包裝方面有下功夫。
線身及做工一如所料，非常實在，接頭跟接線處理近乎完美，成件藝術品一樣，令人不得不讚嘆其做工。
其實未試聲之前己知道Crystal Cable屬瘦身快線，用在厚聲組合會有好明顯改善，但可惜我的組合屬薄聲，未試前已估計其聲底末必啱我用，但依個時候已唔理咁多，一於試試8K線係乜傢伙。
先接上L3000用首慢歌試試，咦~聲底並唔係想像中咁簿，高中音去得盡，音場變得集中，人聲有少少推前，屬意料之外。再用L3000試首快歌，老實講，開頭聽真係好好feel，速度快、低頻勁，但真係太刺激，聽完兩首歌己支持唔到，要停吓休息。
用兩隻線去比較 Nordost Red Dawn vs Crystal Cable Micro，各方面表現都是Crystal Cable勝，唯獨音場及動態方面，Red Dawn有較理想表現，不過兩者價錢真係差太遠，要咁比較真係唔公平...音響世界定律，一分錢一分貨，冇得解。
第二回~ Crystal Cable遇上Esoteric X03SE，待續...
近一個月可能真係得閑得滯，一連橫掃數套絕版經典漫畫，之前幾經辛苦揾返成套銀河鐵路999，依套書我睇過好多次，但次次都睇唔到結局，今次終可一嘗心願，噚日又掃埋一套橫山光輝三國志，依套又係經典中經典，成60本~~跟手個老細幫我揾返套千年女王(我係松本零士迷)，呢套書我又係揾咗好多年，今次買到一套真係奇蹟，再加多套永井豪嘅惡魔人~臨俾錢時，個老細話仲有一套橫山光輝的劉邦與項羽，有成十五本，話見我幫襯開平少少賣埋俾我，卒之走時帶住85本厚裝書返屋企，拎到手都痺。
下一個目標:龜有公園前派出所(約百多本~仲出緊)、明日之丈、電子神童、模型神童3四郎、火之鳥、相聚一刻、巴別二世等....真係有排玩。
又到每年一次敬老會週年紀念晚會，年年都會戴上光圈去幫吓手做兩晚義工，不過今年可能唔係週未舉行，義工行列冇舊年咁多，初時都怕只得義工十個，要控制成一百圍枱會唔會有困難，不過好彩，可能吸收咗舊年教訓，今年公公婆婆們好守秩序，開席散場非常流暢，可喜可賀。
上兩個星期發覺食嘢時左邊牙有少少痛，前幾日終於有時間去見牙醫，諗住驗牙兼洗牙，點知醫生話隻牙開始爛、要補，跟住問我要唔要順便脫埋隻智慧齒，心諗：橫惦嚟到，一次過做埋費事又約過時間，卒之一鑊過，洗牙、補牙、脫牙，脫牙時真係幾血腥，需然打麻醉針後冇痛楚，但過程中見牙醫又砌又扯，又聽到"啪、啪"聲，可想而知幾咁暴力，最後到埋單，要成千九幾銀，最係牙痛完後到肉痛，近幾日傷口好似發炎，攪到瞓唔安、食唔落，真係都唔知要擾嚷到幾時....
昨晚我到Kaman家中小聚，原意只係試試佢嘅新CDP (X03SE)，所以我帶只了耳擴(GS-1)、RCA (Red
Dawn)及耳筒(L3000)去試，點知一試就出事，不知邊一部份出問題，出來的聲音總係久缺力水，低頻顯得太散渙，下潛力不夠，聲音怪怪的，換上阿Nig隻PS-1亦一
樣，聲音亦變得怪怪的，後來接上Kaman嘅Cardas Neutral
Reference再試，低頻係有少許改善，但太單薄及太快，再之後換回Kaman的MGHead MK III耳擴及Cardas Neutral
Reference RCA，聲音仿如脫胎換骨一樣，撞鬼！現在在想，係唔係GS-1的推力不夠(應該沒理由吧...)？或係Red
Dawn的速度太快關係？定係個source太好？真係頭痕...冇理由還原基本步，從新再配？！依家研究緊Audio Valve RKV Mark
II同Rudistor NX-33，不過真係得個睇字，成10K一部...都係攪惦音源先。
例外，我終於發現我隻L3000原來係末煲好，噚日同小肥嗰隻比較，佢嗰隻真係好聽好多，我嗰隻高音太尖，可能踏入衰聲期關係，卒之我低俾Kaman，等佢幫幫手煲起佢到星期一出關，麻煩哂！Kaman兄。
2006年真係眨吓眼就過，舊年發生過及做過好多事，但都好似好快過咁，總括來講算係幾充實，至2007計劃嘛，希望舊年所撒下的種子會喺今年有發展，又係快快樂樂、忙忙碌碌的新一年。
冇去曼谷幾年，今次舊地重遊真係別有一番滋味，自遊行曼谷過聖誕仲算係第一次，估唔到都有驚喜，平安夜晚酒店好識攪氣氛，揾幾個靚女裁歌裁舞，又有主題人物幫人影相，幾開心(對麻甩來講)。
今次入住Grand Hyatt，(我都冇諗過住咁靚酒店)基本上由出機場開始到上酒店房，由頭到尾都有人跟足，完全唔需要煩，幾舒服~~
這次去曼谷最主要目的係做SPA！！所以一到酒店已即飛身到I.SAWAN櫃面訂位，唔好同我講麻甩佬唔做SPA，大把人晨早book定位，真係遲一秒鐘都冇位！
曼谷名勝不太吸引關係，所以次要目的係食！估唔到人可以為食到依種程度，一日可以食唔停，成個Bangkok Paradox超市同food court已經俾我哋掃盡，日日果汁生果、芒果糯米飯、冬蔭功、炸魚肉~~~段估嚟緊半年都唔會食泰國菜住。
以下係今次總括：
可能我個樣似水魚之餘仲好似鷓鴣，俾人"噤"兼呃N次~~ /sigh
今次發現自己都有DD吸引力，同幾個喺酒店做嘅泰國靚姐姐搭跚之餘仲攞到聯絡。Go！Me！！
包括引到人妖在內.... 好在走得快~~OMFG！！
泰國之旅令我皮膚滑咗(緊係！成幾K做SPA)，個肚大咗(日日食日日瞓，唔肥有鬼)，個人虛脫咗(依家嚴重欠缺維他命M)。
不過曼谷自遊行真係幾好玩，來年一定會再去，下次會轉戰曼谷夜生活(今次冇去，真笨)。
噚日一早瞓醒跟阿哥去跑山，佢真係好恆心，每個星期日一早就去跑，反而我都冇去好耐，每次都懶得起身，跑咗個多小時，如常行落山去灣仔食早餐，亦如常每次都會去春園街間金鳳，其實我問過我大佬好多次，間舖又細、人又多、態度又差，點解仲要去？無可否認，奶茶同菠籮油做得好好，港島區來講，可以話入前五名，但次次問完咪又走返去幫襯，真犯賤，當然，以下亦是原因之一。
個老闆娘把口衰、態度差就通街知，不過同我冇衝突所以一路都冇理佢，直到有一次俾我見到佢同人嘈，從那時開始對佢有些少改觀。話說有個中年麻甩，以為自已大枝嘢，巴巴閉咁衝入店內搶位，事頭婆見條麻甩又唔排隊、可能加樣衰，就叫番條潤腸出返來，仲大大聲講"唔X做你生意！"，之後條麻甩亦不甘示弱，向佢炒蝦拆蟹送大禮，一輪舌戰，搬哂全家、海鮮、生果之後，事頭婆可能慶上頭，話要同個麻甩隻揪，可能真係爛佬怕潑婦，加上有班"炸兩"分開佢哋關係，個麻甩佬最後自己走開，真係估你唔到，食菠籮油、飲奶茶之餘，同場加映街頭劇，仲好睇過"功夫"，事頭婆好嘢！夠格！星期日行開我一定幫襯！
我有個朋友真係好得閒，久不久send一大堆'騎呢'綱址俾我，真羨慕佢有咁多時間，但好多謝佢花咁多心機去挖掘咁多'荀嘢'，真係忍唔住要講一句'多謝家姐！！'
以下兩條link係較代表性。
港女災難應變中心
http://www.freewebtown.com/hkgirldisaster/front.htm
Recent Comments