電視日日播嗰隻基本法宣傳歌真係好難聽，嗰個旋律同歌詞，編嗰個真係抵打，不如rap出嚟好過~

依排聽返兩隻歌，Eason隻"十面埋伏"同基仔隻"愛得太遲"，有少少身同感受~

再聽返"愛得太遲"合唱版，腦裡即刻彈出三個英文字 -- " What the fuck！"編嗰個要吊起嚟打！！

近排有新玩具玩，果然冇入錯貨，下星期開始系統一年期重生計劃。

醫生話我欠缺維他命M~~救命~~

待續...

近排綱上睇開嗰到幾個論壇，發覺大部份都係show-off post多，依家真正識玩Headphone嘅人基本上唔會再post心得同分享，因為實在太多水post同無聊post，以前識開同去開論壇真正討論嘅基本上已絕跡，好彩之前都識一班真正玩家，依家自已可以約出嚟兼有個私人吹水區，要試要惜樣樣齊，自得其樂。

前幾日有個一直末見過面嘅仁兄喺MSN傾咗一陣，講到耳筒收藏一回事，又講到某位show off勁水王嘅所謂珍藏點厲害，我只可以講，佢用嘅只係有限錢，另外、佢凈係識買唔識用，睇佢嘅post同聽過佢點玩都知佢係得啖笑，不過用小小錢得到一小部份人仰慕又係幾抵，其實依位水王都已一把年紀啦，仲咁幼稚就真係小見。

另外可以講，Headphone喺Hi-Fi內基本上係唔入流，同聽speaker完全係兩回事，通常係冇辦法下先會退求其次玩耳筒，加上耳筒最貴都係十萬樓下(仲要炒價)，耳塞去到盡都係七、八千(鑲金鑽另計)，論二手市場，又唔係珍貴到個價炒到飛天，所以要講收藏價值又真係講唔上，况且Headphone、earbud屬消耗品，只會愈用愈老化，用耐咗點保養都會壞震膜，唔通買返嚟唔係用嚟聽、用嚟睇乎，我就唔會咁傻，所以買咗一定用到盡，要蓄不如留錢好過！

依家本身套組合用來玩headphone其實都算見得吓人，只不過身痕，仲要加入人的進步基本元素(追求)，決定逐步換，上幾個星期開始第一步大計，四圍物色新source，千揀萬揀，都係Chord One合心水， 音色較暖、密度高、音場亦過得去，又細細部，真係好啱我要求，等我過多一、兩個月有空閒就去捧佢返屋企。

前幾日同個Headphone友喺MSN傾開，講完近排有乜新搞作之餘，講到Headphone Amp，依家部GS-1其實都幾夠用，只可惜對高階耳筒仲差少少，有考慮過Singlepower，但又唔想玩膽，又考慮過Rudistor部RX-33，但聽班友仔話係呃錢之作，用料差到不得了，仲要賣成九百蚊歐羅，需然末聽過唔可盡信，但個心都係唔敢博，卒之最近俾我見到阿Ray哥部新Amp~

部機仲未出街，我估咁嘅架局都唔慌平啦，部機應該用佢之前部B-52做藍本，只不過一部行膽、一部行石，石機我鐘意，仲要有balance玩，睇見都開心，只求唔好貴過部B-52，要成五萬幾，攞我命就得。
同條友仔傾傾吓，又傾到手提Amp，老實話，手提Amp我完全冇興趣，一來出街我一定唔會用，一袋二袋，又重又多線，真係傻先會咁做，二來手提Amp一定比唔上座枱Amp，凈係個電已經好大分別，所以邊有可能好過，所以我成日講，手提Amp只係餸汁撈飯，會好味過白飯但唔夠精彩，只帶某程度上觀能刺激。座枱Amp係煲仔飯，有餸有汁有菜，但要整得好食就要好有心思，過火會燶，唔夠會生米，整煲靚飯好有成功感。我就較偏向食煲仔飯，貴就貴啲，但夠哂精彩。

今次去美國共五日，頭尾交通已冇兩日，所以時間都幾緊湊，第二朝晨早七點已經要起身出門，第一日好在會場人流唔係太多，可以即刻見幾個客兼開個會，有嘢做時間好快過，眨吓眼已經下午五點，Indianpolis個城市話大唔大，但真係冇乜地方去，原本諗住Pacer入Playoff可以去睇，點知佢"臨尾香"入唔到，所以食送飯行一陣Walmart就返酒店。

第二日晨早再去會場，人流比第一日多好多，果然不愧為全北美最大消防展，參觀嘅大部份都大大隻，來自各州嘅消防員，有講有笑咁，氣氛同北京消防展、Hannover Interschutz好唔同，最過癮係某幾個大攤位有幾位靚，女定時跳舞、玩遊戲、海報女郎送簽名海報等，幾熱鬧。

基本上要做嘅事頭兩日已做好，第三日就揸車四圍去，再幫家人、朋友買哂所需，咁就一日。

到返香港嗰日，因知道清關一定煩，所以晨早交車去機場，好在飛國際線條line得兩、三個人，國內線條line有三、四十人排隊，要排國內線就真係死俾你睇，Check-in時我千叮萬囑位姐姐我要最尾嗰兩個位，佢都可以攪錯兼仲要同同行嘅分開坐，仲要死老點話係兩個邊位，我一睇張boarding pass已知死火，兩個都係中間位，叫佢轉緊係玩太極，要我到Chicago後再問，結果唔駛講，去到仲邊有位，唯有算數，求旁邊坐嗰兩位唔好咁大份，上機後，果然上天對我不薄，唔要嗰樣有嗰樣，兩個大隻佬仲要一個體味强烈，坐十五個鐘你都咪話唔攞命，試諗吓熱狗中那條腸，俾人狂擠仲要勁加洋葱芥辣，感覺真爽，好在旁邊一位一出機就吞藥丸瞓覺，成程郁都唔郁，另一位就幾好傾，算係安慰獎~~

So long！U.S！ 出年再見！！

上星期又俾公司派去美國幾日，此行目的只係睇吓全美國每年一次嘅消防展，兼且同嗰便嘅廠家開會，我本身對去美國冇抗拒，但一諗起要搭14個鐘長途機，之後又要再駁機嘅情形，真係千般不願，再加上過保安、清關、機場check in等...全部好似驗屍咁驗，試過幾次真係鬼都怕，但冇辦法，有order要做，唔去唔得。
今次又係坐我"至鍾意"嘅UA，次次坐親都有驚喜，果然今次又唔另外，又帶俾我樂趣，去到UA位check in，得三條友排隊，居然可以要等成九個字，跟住排到我，位阿姐同我講班機要delay兩個鐘先起飛，原本delay好正常，但問題係我到Chicago之後要駁機去Indianpolis，唔使講，班機一定趕唔到，咁唯有叫佢改，好戲來了，之後兩班機全滿，要等最後一班機先有位，即係要我喺Chicago機揚等7個鐘，問佢可唔可以Stand-by，又話香港呢邊做唔到，跟手就咁俾張Boarding Pass打發我走，真係好service到暈。
去到機場咁早，見到機場第二期開咗，又未入閘，就順便行一陣，基本上個mall係得個空間大，冇嘢好行，所以走一圈就入閘直去到Club食嘢，等咗兩個幾鐘，上機時又要驗屍咁驗，水都唔俾帶，見有幾條友即場飲哂成枝果汁先上機，可能費事浪費啩~
UA嘅機可以話十年如一日，當其他航空公司諗緊點改進座位空間、機員服務、餐飲及娛樂時，UA真係睬你都傻，"唔搭就咪搭，我係咁啦！"嘅態度真係好有性格。
搭咗14個鐘飛機，(唔明今次點解橫飛太平洋而唔飛北極)落機攞行李後再過五關斬六將，直衝UA Customer service，嗰便D service又係一絕，絕對拍得住大陸水準，懶理你排幾耐，等得你就等嘅態度，大國即係大國，果然作風相近。好在都俾我哋嘈到Stand by下一班機，唔使呆等七個鐘，之後我問佢行李點算，佢答我行李一定比我先到喎，又信住佢先。
去到Indianpolis，已經係晚上八點，見行李咁耐未出，就走去租車先，不過個心都打定輸數~~~果然如我所料，有一件寄漏，( Yeah~ 又嚟過 )Check過後話要等到凌晨三點先送到酒店喎，睬佢都傻，攞車返酒店食飯睇波，同佢嘈都冇意思，慳返啖氣。

(續~~~)

接上回，話說我成日來來回回中港，曾見到好多趣事，個個一落車，成班人變身戰狼300咁衝到關口， 你推我撞已屬小事，為搶位打架嘈吵亦屬平常事，海關其實應該請人睇睇風水作個法兼佈個局，化一化戾氣先得！講返趣事，曾幾何時有位排我前面位
仁兄，喺香港關口係咁插張回鄉卡入部機，部機當然認唔到，嗰位仁兄試咗幾次唔得後，開始發狂，猛話部機冇X用加四字經嘈點解認唔到、又話要叫人過來檢查
等，其實部機個Display畫面喺佢每次"彈卡"嗰一刻，大大隻字提醒佢要用回正確身份智能卡，無奈位仁兄只顧狂插，完全無視個忠告，後尾我只好提一提
佢，"阿生！你插錯卡！"
又有一次，唔知係咪有部份人過關太心急，前面嗰位取回身份證開閘後，後面嗰位急急腳跟住衝埋入去，仲夠膽死問點解前面咁慢吞吞，真吹漲！
另有一次，喺當初實行自動通關時，仲未有消毒濕紙巾提供，我就見過有位排我前頭幾位嘅阿伯，認指紋時可能手指太乾燥，試好多次都唔得，喺冇辦法之下，佢就
用最原始方法去滋潤佢隻手指，伸佢隻脷舔吓手指再按，果然奏効，俾佢一take過過到，但俾你見到咁情况，你會唔會繼續排？需然其他機都有可能有相同情
况，但見唔到可當冇事發生過，齊來做阿Q~
仲有一次，可能大家用得八達通多，入哂腦真係以為一卡通行，有次過大陸關口時有人真係攞張八達通卡出來放上機上，咁嘅情形，排佢後面嘅理所當然咁又開始送上無限祝福，所以你話人生百態幾過癮~~

自動過關系統都實行咗好耐，好多人開頭以為會更方便及縮短通關時間，但實際上俾我感覺係慢咗之餘仲幾浪費人力，先講香港那邊，插入智能身份證後要等十秒，入咗"馬糟"又要驗指紋，唔知係個sensor弱定設計太進定係手指太乾，次次都要試幾次先過到(包括我)，幾次唔得又要叫人過來幫手開門，好多時後面好人排隊等，你知香港人幾有品，一見咁情况實大大聲講恭喜說話，人被困喺閘內已經夠開心，仲要受眾人祝福你話幾興奮，真係夫復何求。可能咁嘅關係，依家每個位都整盒濕紙巾，家陣過關可以一take過，你話香港政府幾親切。但係有得俾我揀，我一定會走去排人手通關，唔使煩！

講完香港，講大陸方面，你話大陸唔好？我覺得佢套系統好過香港N倍，起碼我從未試過NG兼要出動到用濕紙巾，過關時間真係縮短好多，不過唔知點解，大部份港人一過境會立即變臉，臌臊粗暴、打尖插隊、你推我撞，仲勁過釣魚臺搶灘，隔入度達100%，大家回歸原始社會，幾咁豪邁！

不過以我咁成日來來回回中港，會見到好多趣事，下次先講！

近排再度迷上超合金，之前一直有留意隻"佐滕"版嘅真三一萬能俠超合金，因為無論造型、骨架、造工、配件及上色都係眾多款中最好，不過個定價真係嚇死人(因為個設計師已仙遊)，要成3K以上，加上冇地方放置，所以一路都只敢睇、唔敢買，直至上個星期，我大佬話佢個friend可以攞到平價兼新貨(註：我大佬係超合金、車仔迷，所似都識幾多窿路)，聽個價錢真係好合理，仲要全新冇開過箱，仲諗？即買啦！正想俾錢我大佬託買之際，原來佢己經成套攞返嚟~~我就話之佢，幾大拆開睇睇兼摸摸。

個盒做得幾有誠意！出面現貨大部份只有黑色嗰盒，其實原裝一套應有埋個大盒。

話有誠意係有原因，拉開黑色盒套，以為只有凈色盒，原來內有乾坤。

機身係"鈦金屬"做，唔似依家大部份復刻版以塑膠為主，當然除咗機身、裝甲及壹號戰機外，其餘配件都係塑膠製，但攞上手嗰種質感真係完全兩回事。

遲吓有機會一定會入埋二號同三號，要儲齊一set先夠過癮。

今次呢團話就話係去北海道，實際上喺北海道只停留三日，跟住會一路向南走，由東京返香港，其實咁都好，凈玩北海道實在太寡，始終想去嘅地方唔係咁多。

今次函館有另一驚喜觀點<五菱閣>，起初由下面睇覺得係一個好普通嘅城池，吸引力不大，但當登上旁邊新建成嘅展望塔，由高處望下，原來別有一番景像，成個城池原來係建成星型，當然建成咁一定有原因，依個係歴史長故事，要寫就真係寫到手軟，想知的話，見面我講你聽。

離開北海道後，由青森南下，途經日本三景之一<松島>，松島之所以咁出名，係因為沿海有數十個小島，而每個小島上都佈滿松樹，日本人以此景色為絕景，坐觀光船出海，沿途經過數多個小島，有部份型狀奇特，都算值得一遊。

過完年關，忙完一大輪，終於有時間寫吓Blog，今年選中去北海道，北海道話去話去都講咗好多年(成十幾年)，今次都可以話係圓夢...啩。

結果一行十三人浩浩盪盪出發，基本上今次去嗰幾處地方對我來講吸引力唔大，始終我住日本都有一段時間，都叫到過好多地方，所以總覺得大部份城市都差唔多，唯一吸引我嘅只係地方食品同地方風情。

北海道專有啤酒，俾佢個樣呃到，難飲到嘔~

日本人成日吹噓函館夜景點好，我一直以為函館夜景其實不外如是，因為一路都覺得睇過香港夜景後，其餘嘅都可以不值一提，所以去之前已經先打折扣， 搭攬車上山後，嘩~~人山人海，仲逼過出旺角，結果要左閃右避先逼到上平台，非常狠狽，心諗：既然都來到，睇埋先算！結果一踏出平台，噢~~心中烏氣全消，需然大風又凍兼逼人，但個景真係幾靚，冇可否認燈火係唔及香港，但從另一角度睇，又別有一番風味，有種漁光閃閃感覺。

之後到過小樽，可以叫做其中一個吸引我去嘅地方，可惜只有半個鐘逗留，冇時間行吓附近由貨倉改建嘅商舖，加上又落雨，只好嗱嗱聲影幾張相再急急腳走人。

寫住咁多先~ (續)