宇宙飛龍 (港譯) 原名大空魔竜，細個時見到超合金真係流哂口水，奈何小時只係有得睇冇得玩，前幾日我大佬 (佢已係呢方面專家) 幫我執咗隻舊版宇宙飛龍超合金返嚟，因為冇盒兼唔齊件，所以好鬼平，需然唔齊件，但隻嘢仲好新，所有跤位好實凈，冇脫色及硬化，只係腳位金屬部份有少許銹跡，可以接受，講返隻嘢本身，造工神態都非常接近原著，用料亦足本，嗰D超合金膠魂真係行埋一邊，諗諗吓，隻飛龍只係細我一年，仲大過我細佬，遲吓會有隻大膠終極魔龍，成皮幾嘢.......真係各有各嗜好，佢睇我傻、我話佢痴，據我大佬講，全港應該不出五條~~遲吓定要攪住影張靚相！
上星期六我請咗一大班玩家到我公司攪聚會，先要多謝咁多位大大力支持，器材搬上搬落實在辛苦大家，好似部Marantz Project D1得430台生產，成十幾公斤，見佢搬到上來身水身汗，實在感動~~另外其他兄弟都非常俾面，成幾萬元級器材都搬出來。
今次最過癮係試到Qualia Balanced Blue Dragon同K-1000 Balanced，真係好大驚喜，另外用SACD同普通CD層聽Q010可以分別咁大，分別係一個係喺Hall聽交響、一個係喺studio聽交響，同一CD但完全唔同風格。另外，那幾部DIY Amp好強，絕不輸蝕廠機，連GS-1都可比下來。不過....GS-1搭G08聽PS-1就真係絕配！至於Linn Unidisk1.1，原來跟Ikemi那種風格完全唔同，人聲推後好多，分析亦強勁，但係同我上次去日本試部Akurate有些少分別，可能係聽speaker同headphone出來嘅感覺。
其實前一晚我另請幾位作私人聚會(人情債，以前應承過要兌現)，今次終於試到部RP7，結論係Rudistor唔係咁啱我聽，又可以慳返。嗰晚只有我set器材，但已毒死兩件，呵呵~~~
唔寫咁多，睇相好過。
英國三寶
PS-1& R10 毒死兩件就係依兩隻HP
臨尾原來發現L3000冇攞出嚟，我問有冇人有興趣聽，居然冇人騷我~~可憐的L3K
Lavry Blue，實力恐佈
010配Blue Dragon，果然正過原裝線
Last補充，成日下午一點至九點每人消費HK$200，仲有靚扒食，攪聚會籌備我只用一星期(我好彩，有大家俾面)，駛鬼等到十二月黃金時段仲要$300位得四粒鐘玩。
講返幾年前喺日本住嘅日子，嗰時仲未正式玩Full Size Headphone，一來暫住地方唔想放太多投資，二來喺日本買音響要付出"相當"代價，加上每日只有好短時間喺屋企，所以我較偏向玩Portable Headphone，仲有一個奇怪理由，冬天出街隻耳仔冇咁凍....在我立場，玩Portable Headphone第一條件就係一定要款式好，話哂出街戴，點可以樣衰衰咁，所以音質反而其次，老實講...portable款式你想要幾好音質！亦因為咁，我用過好多牌子及款式，只因我當佢係Fashion一部份，但有一隻耳筒到今時今日我仲好記得，就係Sony Eggo，以前我只用過兩款低階嘅，D-22同D-55，D-22就唔好講，太唔惦，D-55就有少少驚喜，至於D-77，以我所知係深受好評，只係苦冇機會嘗試，直至最近喺網上收到一隻返來，價錢仲係友情價！條友仔話隻耳筒只係用過數次，擺放居多，個個放二手都係咁講，所以只當耳邊風。
收到隻耳筒之後即係插上部MP3機聽，咦？！咁大食！要開到八成要出到正常聲，音色仲好硬吓，唔通l竉壞咗對耳？先唔理，煲返佢幾日先算！連煲佢一星期之後再聽返，噢~~點解爭咁遠！音色正常返，高低收放自如，速度夠快，聽pop真係一流，分析亦好，果然係好嘢！當然，唔可以用Full Size Headphone個標準，但同大部份portable比較，算收足功課。
部Apache遊完埠返嚟，以為有得玩，滿心歡喜開箱兼擺定架步set up，點知發現最重要一環miss咗......呀Ray哥唔係玩我嘛~~~條接連電線唔俾返我點用呀！！！得物無所用，有得睇冇得試，今夜又要call call佢。
前日終於收到部Amp，滿心歡喜諗住有得玩，原來係一場噩夢~~~
事源返到屋企當然立即拆件，攪一大輪拆盒、駁線、接釘腳兼擺位，攪咗成粒鐘身水身汗，以為有回報，接上電源及CD，即刻用隻Q010去試聲，咦？？點解只有電流聲？即刻轉去mid gain及high gain試試，有聲出但只有左聲道，轉用隻L3000去試，都係一樣，唔通接線問題？
即刻揾番條Red Dawn出嚟再試，又係咁.....唔通CDP有事？惟有再用GS-1接上再試，咦？？好正常噃！唔信邪再用隻cheap cheap PX200試試，吓~~右邊又係冇聲，low gain一樣只有電流聲，心諗：唔係呀！咁邪，再用隻B&O A8試試，又一樣，但今次點解右耳driver有熱力傳出？？心知不妙，即刻unplug拎個iPod試試，What the fuck！！右邊driver瓜咗，再試PX200... Holy Shit又係瓜咗！即刻標冷汗求神拜佛隻Q010同L3000要冇事，好彩~~~冇問題。
跟住立即pack返套嘢，連發三封e-mail到廠方，再之後直接打電話過去媽咗十分鐘，條友仔連聲道歉後叫我寄返俾佢，第二日一早用佢個Fedex account寄flight collect返去，依家睇佢點賠！！
美國嘢一直俾我印像手工麻麻，估唔到Ray Samuels D嘢都係咁！！今次仲要聲都末試就被K.O，真失望！！！
唯一可讚係個設計，憑良心講，真係幾靚仔。
接線準備
噩夢開始
喺網上見到呢幅圖：串燒五母女，當笑話睇算，fans勿插~~
不過.....真係幾似樣，同人講佢哋係一家人真係有人信。另外想講，香港藝人嘅個人型像幾老土，一成不變。
因好耐冇留意近排潮流玩邊種魚，近排得閒行開金魚街，又睇返幾個觀賞魚網站，原來依家班發燒友玩到咁激，愈玩愈大條愈恐佈，今次見到一條叫所謂"大口鯨"，應同"狗仔鯨"同宗屬鯰魚料，個樣真係嚇死人，咁核突嘅魚都有人養，仲要貴到嘔兼渴市，核突魚我以前都玩過，但見識過近日的發燒友"新竉"後真係自愧不如，不過養條咁嘅魚喺屋企真係呃到人入場欣賞，夠哂刺激，點激法...睇吓下面條片~~
心血小者勿開！！
總括嚟講中規中矩，冇驚喜、冇失望。不過有嘢講：
- 舞台、燈光有水準
- 音響効果如舊~ sucks ( 完全唔入流...希望紅館重建後有改善 )
- 唱太多國語歌
- 可能之前巡回演唱太多，把聲有少許沙啞 ( 點解唔喺香港開先？？ )
- 訂最貴票都編好X後，原來有仲貴啲嘅門票....聽講要過千~~真係識搶錢
- 個所謂舞台劇真係麻麻
以上~
食玩：即係一般零食另附送嘅小禮品，因為每件禮品係隨機抽中，有時要集齊一套真係要付出相當代價，所以依類產品喺日本同香港係有二手市場及舖頭，主要針對我呢種常抱住一擊即中嘅心態又唔想花時間去抽嘅人，不過、話就話方便，有時件貨品太罕有的話，件貨品會係天價或冇機會揾到，下面呢條紅龍就係例子，記得最初到日本工作嗰年，有款飲品就係剛好送呢套海洋堂的新江之島水族館系列，條紅龍係特別版，抽中的機率好低，所以嗰時冇辦法揾到。
之後幾年逛過大多數二手舖，咁耐以來實物我只係見過兩次，一次喺海洋堂showroom，不過非賣品來的，另一次有間舖需然肯賣出來，但價錢實在嚇死人~~直至噙晚，我大哥終於幫我揾到，仲要幾平嗰隻，開心到暈~~~
幾個月前去開日本，見到下面呢條YUJIN廠嘅過背金龍，質數都幾高，所以諗住買唔到條紅龍就買呢條當係~~但始終金龍同紅龍係冇可能匹配，價錢都差幾倍。 邊有得比！ XD
噙日放工走去銅鑼灣睇The Bourne Ultimatum，之前頭兩集未過，所以上星期週末專登租返嚟睇，每日一套，可以一氣呵成睇哂成個series，三集中我覺得第二集最好睇，今集其實唔差，只係鏡頭搖動得太厲害，真係睇到頭暈~~~
講返主題，話說買票後見仲有時間，就走去HMV睇睇，正當揾緊碟期間，有條友仔喺旁邊口嗑嗑，基於好奇心驅使下，我留意咗佢一陣，果然有料到，條友仔好似稟神咁，喺度數CD，每一行由上至下、由右由左、每三行數一次，然後停一停，再用手勢心口打十字，雙手合十口嗑嗑，跟住又再數，如是者玩咗兩行，跟住可能放工時間人流多咗，條友轉咗去第二邊冇乜人嘅角位又嚟過，莫非香港唱片業真係咁差？要求神先賣得出？真係奇~~~條友打扮幾潮吓，但段估唔會係玩行為藝術嗰隻，反而似high嘢多，不過兩種對我嚟講感覺都係一樣，得個"膠"字。依家諗返起有少少驚，條友會唔會玩落降頭？不過對我應冇關係，我呢D Cheap精只會去HMV試碟，試完仲要唔買，再去188揾嗰隻，段估影響我唔到...啩？！ (笑 )
Recent Comments