煲煉個多月，估計條black dragon已入狀態，K-1000用上XLR在動態方面有明顯進步，聽大場面沒拖泥帶水，臨場感一流，音場定位一直係K-1000強項，所以改善不太明顯，反而高音有明顯進步，沒以前般刺耳，順滑好多，人聲方面比之前的推前少許，聽vocal時有番少少味道，至於低頻方面，繼續貫承K-1000風格，夠哂單薄，所以K-1000到現今我都唔會用來聽pop / rock，因味道實在太淡，就算換線都唔可能有太大改善。亦可能在差不多風格上的010表現太好，所以今次換線行動實在冇驚喜，睇嚟隻K-1000又要入盒長眠一排。

話說前日喺車上聽到電台訪問陳潔麗，我見冇聽佢嘅碟好耐，之前幾隻都係買返嚟聽一、兩次就放入櫃底，唔啱taste關係，最近兩隻我都冇買，前日攞番隻舊碟出來聽聽，冇錯！佢聲低、唱功係一流，比較起當今香港樂壇所謂歌手好上n倍，但都係覺得甜過頭，令人覺得唱到有點作狀，聽一、兩首冇乜問題，但首首用上同一唱腔就過於沉悶，個人覺得一隻碟成唔成功唔係只靠唱功，歌曲編排亦重要，冇錯，隻碟係非主流同專注Hi Fi發燒友市場，對唔住fans都要講句，我實在聽唔完一隻碟，只可以講我唔識欣賞~~

還是覺得妳最好！！聽pop / rock 不二之選！！！賣飛佛！！！！！

最近一個月真係忙到傻，上兩星期無情情上北京三日，個PK dealer又唔講明要做乜，凈係話普通產品培訓，心諗應該係簡簡單單四、五條友學保養維修，所以我冇準備太多嘢，點知去到培訓基地就知"奶"嘢，成個北京市各消防分隊嚟齊，仲有北京市總隊第二交椅訓話演講，話因為明年奧運，國家高度重視產品保養，所以特別安排今次培訓，條PK dealer仲喺度懵盛盛，話唔知個培訓咁大型，驚到問我有冇準備短片俾人睇，我即刻火都嚟，第一：條pk只係兩日前通知要求我去北京幫手做培訓，時間太緊張，根本嚟唔切準備，第二：條PK係北京地頭蟲，冇X理由唔知個培訓會咁大型。第三：佢係北京dealer，係有義務做好以上功夫，唔係錢就識賺大大舊，賣乜都唔知。第四：依款品牌已賣到大陸十多年，你做咁耐冇理由乜都唔識！

最終喺毫無準備下頂硬上一個人喺80人面前做present棟篤笑，最慘係現場所提供的產品型號已停產，跟我現有型號有出入，所以只好跟各大哥講資料要後補~~~臨走我媽多條PK一鑊，唔該以後有咁大單嘢就做多D準備功夫，呢條友仔做嘢都係冇heart，淨睇我喺北京另一dealer已知，所有嘢做足，係有特別或技術上問題先揾我出山，抵佢揾錢。

同月睇咗兩個演唱會，Sandy同Arron，先講Sandy，個hall可以話完全唔惦，好彩我買上層平飛，下層門票D人睇到媽媽聲，坐後少少嘅基本上完全睇唔到個臺，但上層都唔好得去邊，有幾條發瘟柱喺前面檔住，睇得一邊睇唔到另一邊，音響又唔夠大聲，致於歌曲，Sandy唱功係無可挑剔，但sorry....我唔係佢fans，十首歌有八首唔識，所以成場冇乜共嗚，仲差D瞓著zzZZZ.....完場後交通亦有問題，D人好似走難咁，見有車就搶住上，見到咁搶法情願排shuttle bus好過，下次真係揾你去。

Arron嗰場就有少少驚喜，老實講，唱功由始至終我都冇寄予厚望，入去只係想睇佢跳舞，跳舞呢part算交功課，舞臺設計反而有驚喜，起碼睇得幾開心。

前幾日我堂妹出嫁，話哂成家人得一個女，點都要做番D嘢，嗰日由朝早等新郎哥接佢過門，到我送埋佢過男家，夜晚又幫手招呼親朋戚友兼幫手收禮，真係仲忙過出差......今個月都可以話非常充實~~~~

近排計計自已依一、兩年真係出小好多夜街，一來以前班友仔大部份已回歸祖國懷抱，二來自已出得太多差，返嚟時已唔想出街，所以依一、兩年喺香港嘅生活非常之正常。上兩星期由上海返嚟後，唔知係咪食大閘蟹太多，個喉嚨好鬼痛，返嚟咁耐咳到咁耐，睇幾個醫生都仲係咳到癡肺，屋企人見我睇咁多次醫生都未惦，就介紹一位"神醫"過我，我其實知道依位"神醫"好耐，佢最奇特地方係要夜晚先睇症，心諗：醫得好，夜少少冇所謂！於是打電話去約時間，個姑娘同我講要夜晚11點半要輪到我....我聽到已經嚇一跳，嘩！真係咁好生意？！沒法子，醫病緊要~~

食完晚飯等到11點去醫務所，一到門口......嘩！！乜咁多人坐走廊？？唔理咁多，先入去登記再講，登記完姑娘同我講，排我前面仲有十幾人，可能要等到十二點半先到我.......一場來到，只好等~~於是先落街行一陣，不過真係得過"行"字，大部份舖頭已關門，想去揾間coffee shop坐吓，又close....冇嘢好做之後唯有返診所等，好彩我都攞住部NDS喺身，可以解吓悶。打吓打吓，唔經唔覺坐到兩點.....撞鬼！等咗三個幾鐘仲未到我！！就喺我等到元神就嚟出竅時，終於聽到叫我名，入去見醫生連執藥前後唔夠十分鐘搞惦，所以話千金一刻就係咁解~~~~走時已差不多三點，但後面仲有一大班人等，真夠毅力。

落到街水靜河飛，難得一見銅鑼灣SOGO門口可以冇人，過軒尼詩道可以唔睇車，呢種行夜街心情真係久遣，不過我手拎住兩大枝咳藥水一條友行夜街，有少少怕俾差佬，需則我未曾俾差佬過，但都可免則免，於是急急腳上的士返屋企，返到去食藥後成三點半先有得瞓，攪到今朝返工好似喪屍咁款~~

正到冇嘢好講，四個字：值回票價！！同上個演唱會一樣，由前唱到尾，冇多餘費話，現場氣氛亦非常好，今次仲唱返好多舊歌，Eason你係得嘅！抵我次次買貴飛捧你場，另有意外驚喜，encore時居然有劉華出場~~~

前幾日我大佬又發功，唔知喺邊頭幫我揾番套銀河鉄道999 超合金box set，老實講，依套box set真係見都未見過，我記得細個時只見過海運大厦有得賣，不過係逐個車頭跟車廂分開賣，仲要好貴，所以每次只係望住流口水。

999係我最喜歡嘅漫畫之一，佢嘅產品唔係好多，所以算幾罕有，今次收到依件嘢真係開心到飛起，只可惜有少少瑕疵，仲欠一個333嘅襟章，不過，我已好滿足，因為成件非常好，每架車頭都係近乎零破損，保養得非常好，個包裝盒亦新淨，真係忍唔住要引用老怪口頭憚，夫復何求！！

正面~左上角尚欠一襟章

box set背面~~~

前幾日終於收到Moon Audio通知，我訂嗰條Blue Dragon因為個Furutech XLR接頭back order，要下星期先可寄出，又係一間俾錢前乜都得，俾錢後貨未得嘅公司~~間間都係咁衰。心諗條線下星期先到，又未試過用KK夾Apache，不如就喺倉底掘番出來煲煲佢。

一接上部Apache先用Mid Gain試試，咦~~咁少聲？！平常用大部份耳筒我都只用Mid Gain+九點鐘volume，依家要開到三點位置先有正常聲....好！就轉到High Gain 試試，果然用Mid Gain力水唔夠，依家音量推到十二點已夠力，不過有可能隻耳筒"沉睡"太耐，表現有少少生硬，加上之前一直冇好好煲煉，所以等我run-in番幾日先算。

(續~)

試完single end 接口後，當然要試試balanced輸出，因為這點係我選購此Amp的其中一大原因，嗱嗱聲換條Blue Dragon Balanced接上010玩，果然Balanced出來的表現好唔同，力水比起single end 的有力量好多，最明顯係低頻較厚實，高音方面尾音長咗，定位有些許改善，不過好有可能係條cable本身對音質的改善，所以此測試唔可以作準，遲吓我有時間會再用K-1000去試一試真章。

部Amp煲煉兩星期後，最明顯的改善係連貫性，即係坊間所講嘅音樂感，三頻配合得非常好，可以寫寫聽感，今次我主要用Q010作試機，Q010需然屬低抗阻且靈敏度大，但要推得好就非常困難，之前用部GS-1都攪唔惦，所以用佢嚟試最容易聽出分別所在。

音樂開始後果然聽得出分別，高音去得更盡而不拆聲，係悅耳而唔係刺耳，音色通透凝聚，低頻夠實凈而不散渙，同GS-1推出來効果分別非常大，比如之前聽彈結他係用手指去彈，現就用pick去彈的分別，清脆爽快。音場方面，包圍感更勝以前，定位控制得好準確，將Q010長處發揮得淋漓盡緻，調音方面，Apache較中性、音染較少，但比GS-1暖聲，分析力方面，功課都交足，但配Q010聽就有少少過頭~~機身方面，長開8小時都唔會太熱，只有微熱，此乃一大驚喜。

( 待續 )

幾經波折，部Apache終於正常用到，經過兩星期煲練下，部Amp已進入狀態，先講背景，我對此要求甚高，一部設計完善仲要咁價錢的耳擴係唔應該有底噪浮現問題，所以我插上超高靈敏度的Q010去試，背景冇底噪、非常靜，安靜程度拍得住部GS-1，完全達我要求，抵讚！

再講造工及包裝，其實Ray哥的包裝做到好足，一大箱內再有兩箱分開包裝，部Amp包裝得好實淨，箱內全舖上防撞膠，照理論上應好穩陣，但上次咁震壞法真係唔知點解~~做工方面，我可寫包單，部Amp無論外型設計、接口、焊位都係一流，起碼睇得出Ray哥係好有心機喺依方面下功夫，電源部份及Amp本體各送一套四隻的腳釘及釘座，不過我唔太喜歡係用鏍絲轉位安裝，因腳釘上死後如放置的枱面不平都幾惡搞。面板上設計亦不錯，非常清析，四個input按掣各有紅燈表示現正用那個輸入，另有一個mute switch，算幾方便(用來煲cable一流)，volume掣幾順，不過個stepped-attenuator就設定得麻麻，要好小心轉動先可察覺到下一個step volume，如上緊些少會更好。另外亦有gain switch，分三段，個人來講，mid gain已好夠用，遲吓條K-1000 Black Dragon Balanced cable 到後我先再試用 high gain。

( 續 音色編 )~

話說上星期第一次去大連，話就話第一次，但完全唔覺得興奮，只因今次係去補鑊，事原舊年八月賣咗兩台可以話係全世界最大型(中國第一部)嘅排煙機到一間消防車廠，收貨冇問題，安装上車都冇問題，但問題就發生在用家身上，原本設計係冇考慮過中國大陸嘅路面情况，所以部機用唔夠三個月已在支架上發生金屬疲勞而出現裂痕，部車成三百幾萬一台，用得三個月？唔俾人殺已偷笑！所以要廠方立即派人過來改裝兼做維修，起初廠方以為小問題、piece of cake，但當見到實物後，連德國工程師見到都嚇一跳，話第一次見到咁大鑊，唔怪得佢，歐洲、日本基本上唔會發生咁大問題，嗰邊路寬又平，各司機又守交通規則又禮讓，唔似大陸咁亂龍，所以咁震壞情况係好少機會發生。

結果一行人朝朝七點起程，由酒店座的士出發到消防大隊總局做維修，因為佢太大件，為咗大家坐得舒服少少，我要佢坐前座，大陸交通係點我非常清楚，但對外國人、仲要第一次到中國嘅就好刺激，佢自已本人就嚇到面青，所以佢朝朝都好醒神！唔會有Jet Lag！結果連開三日工先攪惦兩台車，害我中秋要喺大連過~~~