數月前去番Headamp網站睇吓Justin最近有咩搞作，原來佢終於完成咗套新modules(講咗7、8年有多)，所有產品會全換上依款新modules，於是我口痕問吓Justin我部舊GS-1可唔可以換，估唔到佢又接受order喎，你對舊客咁好service我梗係即訂，佢仲好快手即用USPS寄俾我。但原來世事係唔會咁如意，件郵包寄出近兩個月都收唔到，只係Track到件貨停响Chicago就停咗喺度，於是我分開問香港同美國郵政係咩問題，答案當然全部係遊花園，喺冇辦法底下只有用chain e-mail戰略日日追Justin，個多星期後佢收番件貨，原來佢地址寫漏好很多資料，我之後就極力要求佢用Fedex同寫足地址再寄出，最多費用我付，佢冇錯係應承你，不過一路拖到你想打X佢，於是又再用chain e-mail戰略日日追，最後今日終於收到。依個週未可以A/B吓新舊modules嘅分別。

冇買耳機補品都有一段日子，唔係條Silver Dragon壞到冇得整我都唔想揾，另一原因係坊間實在太多所謂發燒線真係好呃錢，再加上隔山買牛又好冒險，所以用得到我都唔想再揾。直到昨日試過朋友帶來嘅新線，試過後發現原來土炮都有好嘢，牌子叫labkable，所以就親身上舖睇吓咩料，由於太耐冇蒲，心情有小小似以前newbie嗰時，好唔好意思咁問位四眼哥哥有冇CM線試，好彩位四眼哥哥好好客，一手攞兩條線俾我任試任玩，(原來香港線舖都有service)，試咗一陣，個人較喜歡條Silver Shadow ，聲底有小小似我之前用過嘅SXC，(SXC曾係我最愛，分析同音樂感好豐富，但線身真係太硬，出外好唔方便 )相反Silver Shadow線身較軟，音色比較平衡，手工亦唔錯 ( 同條silver dragon比真係天同地 ) 所以我好快咁决定入一條試試。就咁…又有新玩具~~~